Kollec diplomu ilə müəllim işləmək qadağan olunacaq.

Təhsil Nazirliyinin rəsmi Facebook səhifəsində vətəndaşların sualları cavablandırılarkən bildirilib ki, hazırda kollec diplomu ilə müəllim işləmək sahəsində problem yoxdur: “Lakin gələcəkdə tələblər dəyişəcək, buna görə də müəllim işləmək istəyən kollec tələbələrinin ali təhsil alması məqsədəmüvafiqdir”.

Xatırladaq ki, Təhsil Nazirliyinin Facebook səhifəsində əvvəlcədən elan edildiyi kimi, iyulun 22-dən təhsil sahəsi ilə bağlı vətəndaşları maraqlandıran sualların cavablandırılmasına başlanılıb. Sualların qəbulu iyulun 25 saat 18:00-da başa çatacaq. Göstərilən müddətdən sonra Nazirliyin Facebook səhifəsinə yerləşdirilən suallar cavablandırılmayacaq. Bu tarixə qədər daxil olan sualların cavablandırılması isə davam etdiriləcək. Təkrarlanan və anonim xarakterli müraciətlər istisna olmaqla, digər sualların ardıcıl olaraq cavablandırılması yaxın 2 gün ərzində başa çatdırılacaq.
Səhfədə Facebook istifadəçilərindən xahiş olunub ki, 25 iyul saat 18:00-dan sonra təhsil sahəsi ilə bağlı sualları Təhsil Nazirliyinə (Bakı şəhəri, Xətai prospekti, 49), yaxud Nazirliyin office@edu.gov.az və qaynar-xett@edu.gov.az elektron poçt ünvanlarına göndərsinlər. Bü ünvanlara göndərilmiş suallar qanunvericilikdə nəzərdə tutulmuş müddətdə cavablandırılacaqdır.